【愛犬 Joe Joe】

1986年初夏 - 2003年5月2日上午

摯愛的Joe Joe（賓賓 / 仔）：

咁多年來你從未離開過我地多過一日，雖然今次你一走就唔會再返來，
但相信你已經去到一個快樂無痛苦的世界，
仲有烏烏、葵葵、葵仔、計仔、計計、蝦餃燒賣同埋行雷閃電（全部鼠類）陪你。

屋企冇左你……好唔慣，真係好難頂。

我地永遠都會記得你幾咁與別不同，幾咁精靈，把聲幾咁雄壯，
對眼幾咁大，指甲幾咁長，對耳幾咁臭。

仲有你幾咁怪雞：唔鍾意沖涼，唔鐘意洗耳，
唔俾我地剪趾甲，唔俾人抱（家華除外）……

我地好羡慕你初來時的苗條身段，
又好鍾意期後你那肥豬的身形，
更欣賞你被重重病魔折磨仍好結實的身軀！

你那長長的指甲，行起路上來滴滴聲實在非常動聽，
不過亦好享受你剪完指甲後帶俾我地的片刻寧靜！

屋企每個人都曾在你的屎屎上留下不少足印，
但你都唔輸蝕，在屋企每個角落留低好多尿跡！

多謝你陪左我地16年半，更多謝你係我地身上留下那些無法磨滅的牙齒印。

你永遠都係我地心中。我地真係好愛好愛你！

最重要係：
我地永遠都唔會忘記你果隻獨特的菜蜜味臭屁！！！


永遠掛住你的
阿媽、家華、阿敏、家琪（仲有成日同你狗咬狗骨的阿希）


主人：阿媽、家華、阿敏、家琪（仲有成日同你狗咬狗骨的阿希）　

Email: ungujoe@yahoo.com 　品種: 迷你賓沙犬